成日聽阿媽講，芝麻綠豆小事就咪鬼理佢，做大事要緊，但Sugar有個朋友阿基，近日就將芝麻小事掛口邊，真係畀佢煩死兼笑死。
話說Sugar前日開工，同隔籬舖頭幾個朋友一齊嗌Pizza食，最後揀個有芝麻Pizza，但點知當中一位朋友原來對芝麻敏感，搞到有得睇，冇得食，難怪佢之後嬲到終日口芝麻前又芝麻後，依家大家見到呢個「芝麻基」都走夾唔抖，係人都怕佢。
整Pizza要落料，唔係就好睇唔好食，甚至食會敏感，帶隊搞足球都係，搵錯人或者訓練方法唔，都一樣會出事。好似今季德甲班霸拜仁慕尼黑，新帥奇連士文就真係搵錯人，揀個茅王雲邦美做隊長，結果只係第二場聯賽，雲邦美就領紅被逐，今晚要停賽。拜仁今季聯賽仲未開齋，表現令人失望，依家連列貝利同雲邦美都一齊缺陣，真係攻守都唔掂，反而哈化柏林近五仗取得四勝一和，成隊波都好好狀態，夠信心，真係連拜仁都唔驚啦！
