今晚圖圖盃上演第三圈首回合賽事，好多大家熟口熟面球隊亮相，波童最睇好法甲雷恩同英超阿士東維拉。雷恩為備戰今次圖圖盃早六月底已開操，熱身賽三連勝足證狀態對辦，有主場之利力足擊敗烏克蘭泰夫利亞（周日凌晨1時開賽）；另一場丹麥奧丹斯歐洲只屬三線球隊，作客維拉憑較高個人質素亦可投以信心一票。（周日凌晨2時05分開賽）
圖圖盃已經踢到第三圈，由於勝方可獲足協盃參賽資格，對球隊收入大有幫助，有心參賽當然唔會玩玩，好似法甲雷恩早六月底已開操，從佢近期熱身賽連勝甘岡、華倫西恩斯及比斯特兼一球不失，證明球員已開始上力，就算新加盟加納前鋒基恩、瑞典國腳彼德漢臣及喀麥隆中場麥比亞歸隊不久，對整體發揮應該影響不大。
泰夫利亞未谷起
新一季烏克蘭聯賽周中開鑼，泰夫利亞首戰○比○打和迪尼普，狀態唔見得標青，上季佢到聯賽第五名，好大原因係靠主場之助；相反雷恩主場一向有保證，上季主場勝出率逾五成，今場捧主W正路。
奧丹斯好打有限
另一場心水係丹麥奧丹斯主場對英超阿士東維拉，維拉新季有美爾保轉投祖雲達斯，隊長巴利又喊離隊，表面上問題多多，不過一睇對手奧丹斯陣容，前丹麥國腳、現年三十七歲凱域係後防主將，中場比斯格特連打比郡都踢唔掂，前鋒添姆亦係曼聯青年軍棄將，兩者實力有一定距離。維拉領隊奧尼爾講明要玩足協盃，卡維、艾邦拉荷、艾舒利楊格及新兵薛維爾均會披甲，有力作客贏波。
